You are here

“དགེ་འདུན་ཆོས་འཕེལ། བོད་ཀྱི་དེང་རབས་རི་མོའི་སྒྱུ་རྩལ་བ་དང་པོ། ༼དབྱིན་ཡིག་དཔར་མ།༽

“དགེ་འདུན་ཆོས་འཕེལ། བོད་ཀྱི་དེང་རབས་རི་མོའི་སྒྱུ་རྩལ་བ་དང་པོ། ༼དབྱིན་ཡིག་དཔར་མ།༽
Thursday, May 22, 2014

དགེ་འདུན་ཆོས་འཕེལ་གྱི་རྣམ་དཔྱོད་དང་ངག་རྩལ་གྱིས་སྐྱེ་བོ་མང་པོའི་ཡིད་དབང་འཕྲོག་དང་འཕྲོག་བཞིན་ཡོད། ད་དུང་ཁོང་ནི་རི་མོའི་སྒྱུ་རྩལ་པ་ཞིག་ཡིན་པའི་གྲགས་པ་འབར་ན་ཡང་མི་རྣམས་ཀྱི་མིག་གི་ལོངས་སྤྱོད་དུ་ཁོང་གི་རི་མོའི་བརྩམས་ཆོས་ཉུང་ཤས་ཤིག་མ་གཏོགས་སྨིན་མེད།

ད་རེས་དབུ་འབྱེད་གནང་རྒྱུའི་དཔེ་དེབ་འདིའི་ནང་ལ་བཀོད་པའི་ཆུ་ཚོན་གྱི་རི་མོ་དང་སྐྱ་རིས་ཀྱི་རི་མོ་ཁག་གཉིས་ཡོད་པ་ནི། ༢༠༠༣ ལོར་ཨ་རི་ནེའུ་ཡོག་ན་ཡོད་པའི་ཀུན་ཕན་ཐེབས་རྩ་ཚོགས་པའི་ལ་རྩེ་དཔེ་མཛོད་ཁང་གིས་དགེ་འདུན་ཆོས་འཕེལ་འཁྲུངས་ནས་ལོ་ངོ་བརྒྱ་ཐམ་པ་འཁོར་བའི་རྗེས་དྲན་ཚོགས་འདུ་བརྗེད་དུ་ཕངས་པ་ཞིག་སྐོང་ཚོགས་བྱས་པའི་སྐབས་སུ་ཐེངས་དང་པོར་འགྲེམ་སྟོན་བྱས་པ་དེ་རྣམས་ཡིན་ཞིང་། དཔེ་དེབ་འདིའི་ནང་ལ་ཐེངས་དང་པོར་ལོ་མང་གི་རིང་ལ་ཁ་ཐོར་བའི་རི་མོའི་ཚོགས་དེ་གཉིས་གདན་འཛོམས་གྱིས་དཔེ་སྐྲུན་བྱེད་ཐུབ་པར་གྱུར།

རི་མོ་ཁག་དེ་གཉིས་ཀྱི་ལྷན་ཐབས་སུ་དགེ་འདུན་ཆོས་འཕེལ་གྱི་སྐོར་ལ་ཉམས་ཞིབ་གནང་མཁན་སྐུ་ཞབས་རྡོ་ནོལ་ ལོ་པེ་སི་(Donald Lopez)གྱིས་དཔེ་དེབ་འདིའི་ཆེད་དུ་བརྩམས་པའི་དགེ་ཆོས་ཀྱི་སྐུ་ཚེ་དང་གསུང་རྩོམ་སྤྱི་ལ་སྐྱར་ཞིབ་ཀྱི་རྩོམ་ཡིག་ཅིག་དང་། དགེ་ཆོས་ཀྱི་རི་མོའི་སྐོར་ལ་དབྱེ་ཞིབ་ཀྱི་རྩོམ་ཡིག་གཅིག་ཀྱང་བཀོད་ཡོད། རྩོམ་ཡིག་དེ་གཉིས་ནི་ད་ཕན་དགེ་ཆོས་ཀྱི་གསུང་རྩོམ་དང་རི་མོ་གང་མང་དང་། དགེ་ཆོས་སྐོར་ལ་ཞིབ་འཇུག་གི་འབྲས་བུ་སྣ་མང་ལ་གཞི་བཅོལ་ནས་བྲིས་པ་ཡིན། རྡོ་ནོལ་ ལོ་པེ་སི་ནི་ཨ་རིའི་མེ་ཞི་སྒན་སློབ་གྲྭ་ཆེན་མོའི་ཨེ་ཤེ་ཡའི་སྐད་ཡིག་དང་རིག་གནས་སྡེ་ཚན་གྱི་ནང་ཆོས་དང་བོད་རིག་པའི་དགེ་རྒན་ཆེན་མོ་ཡིན་ལ་རྒྱལ་སྤྱིའི་སྟེང་ལ་དགེ་ཆོས་ཞིབ་འཇུག་གི་འབྲས་བུས་ཧ་ཅང་ཕྱུག་པའི་མཁས་པ་ཞིག་ཀྱང་ཡིན། ཁོང་གིས་དགེ་ཆོས་སྙན་རྩོམ་གྲངས་བརྒྱ་དང་བཞི་དབྱིན་བསྒྱུར་གནང་ནས་དབྱིན་བོད་ཤན་སྦྱར་གྱིས་དཔེ་སྐྲུན་གནང་ཡོད་པ་དང་། ཀླུ་སྒྲུབ་དགོངས་རྒྱན་ཡང་དབྱིན་སྒྱུར་གྱིས་དཔེ་སྐྲུན་གནང་ཚར་བ་མ་ཟད། ཟླ་ཤས་ཀྱི་སྔོན་ལ་གཏམ་རྒྱུད་གསེར་གྱི་ཐང་མ་ཡང་དབྱིན་སྒྱུར་གྱིས་དཔེ་སྐྲུན་གྲུབ་ཡོད།

དཔེ་དེབ་དེའི་སྒོ་འབྱེད་དང་མཉམ་དུ་ཀུན་ཕན་ཐེབས་རྩ་ཚོགས་པའི་དྲ་རྒྱའི་ཐོག་ནས་དགེ་ཆོས་སྐོར་གྱི་ཡིག་མཛོད་ཅིག་ཀྱང་སྒོ་འབྱེད་བྱེད་ཀྱི་ཡོད། ཡིག་མཛོད་དེའི་ནང་ལ་ ༡། ༢༠༠༣ ལོའི་ཚོགས་འདུའི་ཐོག་གི་གཏམ་བཤད་རྣམས་དང་། ༢། ཚོགས་འདུ་དེའི་འདྲ་པར་རྣམས། ༣། དགེ་ཆོས་ཆོས་འཁྲུངས་གཞིས་དང་། འཁྲུངས་སའི་སྡེ་བ། འཁྲུངས་གཞིས་སུ་ཉར་ཡོད་པའི་དགེ་ཆོས་ཀྱི་སྐུ་ཆས་དང་། དཔེ་དེབ། ཕྱག་བྲིས་ཁག་ཅིག་གི་འདྲ་པར། ༤། སུའེ་སི་ཡི་གློག་བརྙན་བཟོ་མཁན་བཟོ་མཁན་ལུའུ་ཁི་ཧྲད་ལིར་ནས་དགེ་ཆོས་སྐོར་གྱི་དངོས་བྱུང་གློག་བརྙན་ “སུན་ཕྱུང་བའི་གྲྭ་པ།”ཞེས་པ་བཟོ་ཆེད་བྱས་པའི་བཅར་འདྲི་སུམ་ཅུ་སོ་གཉིས་བོད་ཡིག་དང་དབྱིན་ཡིག་གཉིས་སོགས་ཡོད། www.trace.org/latse-library/special-collections/gendun-chopel

དགེ་འདུན་ཆོས་འཕེལ། བོད་ཀྱི་རི་མོའི་སྒྱུ་རྩལ་བ་དང་པོ།” ཞེས་པའི་ཕྱག་དེབ་དབུ་འབྱེད་ཀྱི་མཛད་སྒོ་འདི་ནི་ཀུན་ཕན་ཐེབས་རྩ་ཚོགས་པ་དབུ་བརྙེས་ནས་ལོ་ངོ་༢༠འཁོར་བའི་དགའ་སྟོན་གྱི་དུས་ཆེན་སྲུང་བརྩི་ཞུ་བའི་ལས་རིམ་གྱི་ཐོག་མ་ཡིན་ལ། སྤྱི་ལོ་༢༠༡༤ལོའི་ཟླ་བ་༥ཚེས་༢༢རེས་གཟའ་ཕུར་བུའི་ཉིན་ཕྱི་དྲོའི་ཆུ་ཚོད་དྲུག་དང་ཕྱེད་ཀར་ཨ་རིའི་ནེའུ་ཡོག་གི་ཀུན་ཕན་ཐེབས་རྩ་ཚོགས་པའི་ལ་རྩེ་དཔེ་མཛོད་ཁང་ལ་འཚོག་རྒྱུ་ཡིན་པས། དེའི་སྐབས་སུ་ང་ཚོས་ཆང་དང་ཞལ་ཏོག་དྲང་ནས་རྩོམ་པ་པོ་དང་དངོས་སུ་ཁ་བརྡ་བྱ་རྒྱུའི་གོ་སྐབས་སྐྲུན་རྒྱུ་ཡིན་པས་སྐུ་ཉིད་ངེས་པར་དུ་ཕེབས་རྒྱུའི་གདན་ཞུ་འབུལ་བཞིན་པ་ལགས།

Donald Lopez

Donald Lopez

Donald S. Lopez Jr. is the Arthur E. Link Distinguished University Professor of Buddhist and Tibetan Studies at the University of Michigan. The author of numerous books on Buddhism, his translations of the works of Gendun Chopel appear in The Madman's Middle Way, In the Forest of Faded Wisdom, and Grains of Gold: Tales of a Cosmopolitan Traveler (translated with Thupten Jinpa).

TRACE FOUNDATION

132 Perry St., Suite 2B

New York, NY 10014

1 (212) 367-8490

events@trace.org

NEAREST SUBWAYS:

A/C/E/B/D/F/M to W. 4th St. –

Washington Sq

L/A/C/E to 8th Ave. – 14th

1 to Christopher St.

PATH to Christopher St.